УРС УÆРЫКК ДЫН ФЕСТОН

Æвдисы, чидæр кæйдæр тыххæй йæхи мæлæтмæ ратдзæн.

«Ацу, дæ сæрыл мæ æрхæссай, ацу! Ацу, урс уæрыкк дын фестон, ацу! Уæддæр дæ нæ ныууадздзæн дæ фыд...» (Букуылты А. Зарæг баззад цæргæйæ.)

Ивгъуыд заманы рынчынæн исты баххуыс æнхъæл цыдысты дæснытæм. Уыдон сын амыдтой нывонд кæнын, нывонд кодтой нæл фыс, уæрыкк (хъуамæ уыдаиккой æнæнысан æмæ сыл сау тæпп ма уыдаид) кæнæ нæл род, уæныг. Уæрыккæн йе 'хсарфарсыл кæд бур стъæлф уыдаид, уæд æй аиппыл нæ нымадтой. Уæрыкк цы дзуары номыл нывонд кодтой, уый æргæвстой дзуары бын хуыцаубоны кæнæ хæдзары. Хæдзары-иу æй куы аргæвстой, уæд-иу хæдзарæй æд кувинæгтæ сарæзтой æртæ къахдзæфы дзуары номыл. Дæсныты амындмæ гæсгæ, цыма урс уæрыкк куы аргæвдой, уæд рынчыны низтæ йемæ ахæсдзæн. Ардыгæй цæуы фидар дзырдбаст: «Урс уæрыкк дын фестон».